தைத்திருநாள் இல்லமெல்லாம்
தளிர்த்திடும் தைப்பொங்கல்
இத்தனை நாள் காத்திருந்தோம்
இனிய தமிழ்ப்பொங்கல்
கூவி அழைத்திடும் சேவல்
குதித்தெழுவோம் குளிப்போம்
பூவெடுப்போம் புதிதணிவோம்
பொங்கலன்று நாங்கள்
கோலமிட்டு விளக்கேற்றிக்
கும்பிடுவாள் அம்மா
பாலெடுத்துப் பொங்கலுக்குப்
பானை வைப்பார் அப்பா
விரும்பிய மா வாழை பலா
விதவிதமாய்க் கனிகள்
கரும்பிளனீர் படைத்து மனம்
களித்திடுவோம் நாங்கள்
வெண்ணிறப்பால் பொங்கி வர
வெடி சுடுவோம் நாங்கள்
இன்னமுதப் பொங்கலுண்ண
இணைந்து நிற்போம் நாங்கள்
ஒரு காலத்தில் இப்படியெல்லாம் பாடிப் பொங்கியது ஞாபகத்தில் எட்டிப் பார்த்தாலும் அமெரிக்காவில் பொங்கலன்று ரைஸ் குக்கரில் பொங்கி closet இல் இருக்கும் சாமி படத்திற்குப் படைத்து விட்டு சூரியனையே பார்க்க முடியாத நாளில் பொங்க வேண்டியிருக்கும் சோகம். கடைசியில் இன்னமுதப் பொங்கலை சாப்பிடக்கூட நேரம் இல்லாமல் பெட்டியில் போட்டு அலுவலத்திற்கு கொண்டு ஓடியது அதை விட சோகம். போகும் போது காரில் ஒலித்தது "வெயிலோடு விளையாடி வெயிலோடு உறவாடி" . ம் ம் ம் ம் ம் ............... என்னத்தை சொல்லுவது அமெரிக்க வாழ்க்கையை.
No comments:
Post a Comment